སྨོན་ལམ་ཀློག་འདོན་རིག་ནུས་ངོ་སྤྲོད། བོད་ཀྱི་སྐད་ཡིག་ལ་གྲངས་འཛིན་གྱི་སྒྲ་སྐད་གསར་པ་ཞིག་སྦྱིན་པ།

བོད་ཀྱི་སྐད་ཡིག་ནི་དུས་རབས་མང་པོའི་རིང་གི་ཤེས་རིག་དང་། རིག་གཞུང་། རྩོམ་རིག ལོ་རྒྱུས་བཅས་ཀྱི་ཉིང་བཅུད་འཁུར་བའི་སྒལ་གཞོང་ཡངས་པོ་དེ་ཡིན། དེང་སང་དྲ་རྒྱའི་བརྒྱུད་ལམ་དུ་གནས་ཚུལ་དང་རྒྱུ་ཆ་མང་དུ་འཕེལ་བཞིན་པའི་དུས་སྐབས་འདིར། བོད་ཀྱི་སྐད་ཡིག་འདི་ཉིད་དེང་རབས་འཕྲུལ་རིག་གི་འཇིག་རྟེན་དུ་ཡི་གེ་འབྲི་ཀློག་ཙམ་དུ་མ་ཟད། ཤེས་བྱ་ཉན་བཤད་ཀྱི་ཐད་ལའང་རྩོལ་མེད་རང་བཞིན་གྱིས་བཀོལ་སྤྱོད་ཐུབ་རྒྱུ་ནི་ཧ་ཅང་གལ་འགངས་ཆེན་པོ་ཡིན།

སྨོན་ལམ་ཀློག་འདོན་རིག་ནུས་ནི་སྨོན་ལམ་མིས་བཟོས་རིག་ནུས་ཚན་པས་གསར་སྤེལ་བྱས་པའི་སྒྲ་སྐད་གསར་སྐྲུན་གྱི་མ་ལག་ཅིག་ཡིན། འདིས་བོད་ཡིག་གི་རྩོམ་ཡིག་རྣམས་རང་བཞིན་གྱི་སྐད་སྒྲའི་ངོ་བོར་སྒྱུར་ཐུབ། མ་ལག་འདི་ནི་བོད་སྐད་ཡིག་གི་ཁྱད་ཆོས་ལ་དམིགས་ནས་ཆེད་དུ་བཟོས་པ་ཞིག་ཡིན་པས། བོད་ཀྱི་སྐད་ཡིག་འདི་ཉིད་དུས་རབས་གསར་པའི་གྲངས་འཛིན་བཀོལ་སྤྱོད་ཀྱི་མཉེན་ཆས་ཁྲོད་དུ་བེད་སྤྱོད་གཏོང་བར་ཕན་རླབས་ཆེན་པོ་འབྱུང་བཞིན་ཡོད།

མི་རྣམས་ཀྱིས་ཉིན་ལྟར་ངག་གི་སྒྲ་སྐད་བརྒྱུད་ནས་ཕན་ཚུན་འབྲེལ་བ་བྱེད་བཞིན་ཡོད། འཛམ་གླིང་གི་གཙོ་རྒྱུག་སྐད་ཡིག་མང་པོ་ཞིག་ལ་སྔ་མོ་ནས་ཡར་ཐོན་ཅན་གྱི་སྒྲ་སྐད་འཕྲུལ་རིག་ལག་རྩལ་ཡོད་ནའང་། བོད་ཀྱི་སྐད་ཡིག་ལ་མཚོན་ན་དེ་འབྲེལ་གྱི་མཉེན་ཆས་དང་ལག་རྩལ་གྱི་མཐུན་རྐྱེན་ཧ་ཅང་དཀོན།

སྨོན་ལམ་སྒྲ་འཛིན་རིག་ནུས་ཀྱིས་འཕྲུལ་ཆས་ཁག་ལ་བོད་སྐད་གོ་བར་རོགས་འདེགས་བྱེད་པ་དང་ཆབས་ཅིག སྨོན་ལམ་ཀློག་འདོན་རིག་ནུས་ཀྱིས་ཀྱང་འཕྲུལ་ཆས་དག་གིས་བོད་སྐད་རང་བཞིན་པ་ཞིག་ཤོད་ཐུབ་པར་བཟོས་ཏེ། ཕན་ཚུན་ཡ་མ་བྲལ་བའི་ཆ་ལག་ཡོངས་སུ་ཚང་བར་བྱས་ཡོད།

ལག་རྩལ་འདི་གཉིས་ཟུང་དུ་འབྲེལ་བ་བརྒྱུད། བོད་སྐད་གཅིག་པུའི་ལམ་ནས་ཕན་ཚུན་སྐད་ཆ་ཤོད་རེས་བྱེད་ཐུབ་པའི་སྒྲ་གདངས་གཞིར་བཟུང་གི་མིས་བཟོས་རིག་ནུས་མ་ལག་བསྐྲུན་རྒྱུ་དེ་དངོས་སུ་ལག་ལེན་འཁེལ་ཐུབ་པ་བྱུང་ཡོད།

ང་ཚོའི་དམིགས་ཡུལ་ནི་འཕྲུལ་ཆས་ཀྱི་སྐད་སྒྲ་སྐྱོ་པོ་ཞིག་རྒྱུན་སྐྱོང་རྒྱུ་དེ་མིན་པར། ཉན་མཁན་གྱི་རྣ་བར་བདེ་ཞིང་རང་བཞིན་ལྷུན་ཆགས་སུ་མངོན་པའི་སྒྲ་སྐད་ཅིག་གསར་སྐྲུན་བྱ་རྒྱུ་དེ་ཡིན།

སྨོན་ལམ་ཀློག་འདོན་རིག་ནུས་ཀྱི་ཆེད་དུ། རུ་ངར་ཞིབ་ཚགས་ཀྱིས་གྲ་སྒྲིག་བྱས་པའི་བོད་སྐད་ཀྱི་སྒྲ་འཇུག་ཆུ་ཚོད་ ༢,༤༠༠ ལྷག་དང་། སྤུས་ཚད་ལྡན་པའི་སྒྲ་སྐད་ཆུ་ཚོད་ ༡༧༠ ལྷག་བཀོལ་ནས་དཔེ་གཞིར་སྦྱོང་བརྡར་སྤྲད་ཡོད།

ད་དུང་བོད་ཡིག་གི་ཚིག་གི་སྒྲ་གདངས་འདོན་སྟངས་དང་། སྒྲ་སྐད་གསར་སྐྲུན་གྱི་སྤུས་ཀ་གོང་མཐོར་གཏོང་ཆེད། བོད་ཡིག་གི་ཡི་གེ་ལས་སྣོན་བྱེད་པར་ཆེད་དམིགས་སུ་བཟོས་པའི་ཡོ་ཆས་ཁག་ཅིག་ཀྱང་གསར་སྤེལ་བྱས་ཡོད།

གསར་སྐྲུན་བྱས་པའི་སྒྲ་སྐད་འདི་དག་ནི་མི་དངོས་ཀྱི་ངག་གཤིས་དང་ཧ་ཅང་ཉེ་བར་བཟོས་ཡོད་པས། ཉན་མཁན་གྱི་རྣ་བར་བདེ་ཞིང་ཡིད་དབང་འཕྲོག་པ་ཞིག་ཡོད།

སྨོན་ལམ་ཀློག་འདོན་རིག་ནུས་འདི་ཉིད་མི་འགྱང་བར་འཐོན་ལ་ཉེ་བའི་“མེ་ལོང་རིག་ནུས་ཀྱི་ཀུན་འདུས་མ་ལག་” (Melong AI ecosystem) གི་ཆ་ཤས་ཤིག་ཏུའང་འགྱུར་ངེས་ཡིན་ལ། འདིས་མཉེན་ཆས་བཟོ་སྐྲུན་པ་དང་ཚོགས་པ་ཁག་གིས་བོད་སྐད་ཀྱི་སྒྲ་སྐད་ཉེར་སྤྱོད་མཉེན་ཆས་གསར་པ་མང་པོ་གསར་སྐྲུན་བྱེད་པར་ཡང་ཕན་ཐོགས་པར་ངེས།

སྨོན་ལམ་ཀློག་འདོན་རིག་ནུས་ཀྱིས་བོད་ཀྱི་སྐད་ཡིག་ལ་རང་བཞིན་ལྷུན་ཆགས་ལྡན་པའི་གྲངས་འཛིན་གྱི་སྒྲ་སྐད་ཅིག་མཁོ་འདོན་བྱེད་པ་བརྒྱུད། མ་འོངས་པའི་འཕྲུལ་རིག་གི་ཁྲོད་དུ་བོད་ཀྱི་སྐད་ཡིག་ཀྱང་དུས་རབས་དང་མཉམ་སྐྱོད་ཐུབ་པའི་འགན་ལེན་བྱེད་བཞིན་ཡོད།

འདིས་ནི་སྨོན་ལམ་སྒྲ་འཛིན་རིག་ནུས་དང་། བོད་ཡིག་གི་མིས་བཟོས་རིག་ནུས་ཀྱི་ལག་རྩལ་གཞན་དག་དང་ཟུང་འབྲེལ་གྱིས་མིས་བཟོས་རིག་ནུས་ཀྱི་དུས་རབས་འདིའི་ནང་བོད་ཀྱི་སྐད་ཡིག་འདི་ཉིད་ཐུན་མོང་གིས་བདེ་བླག་ཏུ་བཀོལ་སྤྱོད་ཐུབ་པ་བཟོ་བའི་མདུན་སྐྱོད་ཀྱི་གོམ་སྟབས་གཞན་ཞིག་མཚོན་ཐུབ།