སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠

བོད་ཀྱི་སྐད་ཡིག་འདི་ཉིད་དཔེ་དེབ་དང་ཡིག་ཆ་ཁོ་ནའི་ནང་དུ་གནས་པ་ཙམ་མིན་པར། མི་རབས་ནས་མི་རབས་སུ་བརྒྱུད་པའི་གཏམ་གླེང་དང་། གསུང་ཆོས། བཅར་འདྲི། གླུ་གཞས་སོགས་ངག་ཐོག་རིག་གནས་ཀྱི་ཁྲོད་དུའང་གསོན་པོར་གནས་ཡོད།

འོན་ཀྱང་། རིག་གནས་འདི་དག་གི་ཆ་ཤས་མང་པོ་ཞིག་སྒྲ་འཇུག་རྒྱུ་ཆའི་རྣམ་པ་ཁོ་ནར་ལྷག་ཡོད་པས། དེང་རབས་ཀྱི་འཕྲུལ་རིག་ལག་རྩལ་བཀོལ་ནས་བཤེར་འཚོལ་དང་། ཉར་ཚགས། ལོ་ཙཱ་བྱེད་པ་སོགས་སུ་བེད་སྤྱོད་གཏོང་བར་དཀའ་ངལ་ཆེན་པོ་འཕྲད་བཞིན་ཡོད།

སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠ འདི་ནི། བོད་སྐད་ལ་ཆེད་དམིགས་ཀྱིས་བཟོས་པའི་སྒྲ་སྐད་ངོས་འཛིན་མ་ལག་ཅིག་ཡིན། འདིས་བོད་སྐད་ཀྱི་གསུང་བཤད་ལ་ཉན་ནས་ཐད་ཀར་ཡིག་འབེབས་བྱེད་ཐུབ་པས། གྲངས་འཛིན་གྱི་དུས་རབས་འདིར་བོད་ཀྱི་ཤེས་བྱ་རིག་གནས་རྣམས་ཐུན་མོང་གིས་ལོངས་སུ་སྤྱོད་པར་ཕན་ཐོགས་དང་ནུས་པ་བླ་ལྷག་འདོན་ཐུབ།

དེའང་གསུང་ཆོས་དང་། ངག་རྒྱུན་ལོ་རྒྱུས། འབེལ་གཏམ། བཅར་འདྲི། ཚོགས་འདུ། རྒྱུན་ལྡན་གྱི་ཁ་བརྡ་གླེང་མོལ་བཅས་ཐམས་ཅད་ཀྱི་ཁྲོད་དུ་ཉར་ཚགས་བྱེད་རིན་ཡོད་པའི་གནས་ཚུལ་མང་པོ་འདུས་ཡོད། འོན་ཀྱང་། དེ་དག་སྒྲ་འཇུག་རྒྱུ་ཆ་ཁོ་ནར་ལྷག་པ་ཡིན་ན། ད་གཟོད་བཤེར་འཚོལ་དང་། གོ་རིམ་སྒྲིག་པ། ཕན་ཚུན་བགོ་འགྲེམས་བྱེད་པ་སོགས་ལ་དཀའ་ངལ་འཕྲད་ངེས་ཡིན།

དེར་བརྟེན། སྒྲ་སྐད་ངོས་འཛིན་ལག་རྩལ་གྱིས་གནད་དོན་དེ་རིགས་རྨང་ནས་སྒྱུར་ཐུབ་ལ། སྨོན་ལམ་སྒྲ་འཛིན་རིག་ནུས་ཀྱིས་བོད་ཀྱི་སྒྲ་སྐད་རྣམས་ཡི་གེར་ཕབ་པ་བརྒྱུད།

སྨོན་ལམ་སྒྲ་འཛིན་རིག་ནུས་ནི་བོད་ཀྱི་སྒྲ་སྐད་འདི་ཉིད་མ་འོངས་པའི་འཕྲུལ་རིག་ལག་རྩལ་གྱི་ཆ་ཤས་ཤིག་ཏུ་གནས་ཐུབ་པའི་ཆེད་དུ་བྱུང་བ་ཡིན།

དེའི་སྔོན་ལ་དམིགས་བསལ་གྱི་དཀའ་ངལ་འགའ་ཤས་ཤིག་ཐག་གཅོད་བྱེད་དགོས།

སྤྱོད་མཁན་ཚོས་ཆུ་ཚོད་མང་པོར་མིའི་ལག་པ་ཁོ་ནར་བརྟེན་ནས་ཡིག་འབེབས་བྱེད་པའི་ངལ་བ་བསྟེན་མི་དགོས་པར། སྒྲ་འཇུག་རྒྱུ་ཆ་ནས་རང་འགུལ་གྱིས་ཡི་གེ་སྐྲུན་ཐུབ།

རྒྱུན་ལྡན་གྱི་ཡིག་འབེབས་མ་ལག་གི་སྟེང་དུ། སྨོན་ལམ་རིག་ནུས་ཚན་པས་ “སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠ ཐད་བསྒྱུར་མ་ལག” (Monlam STT v4 Live) ཅིག་ཀྱང་གསར་སྐྲུན་བྱས་ཡོད།

ཐོན་རིམ་འདིས་སྐད་ཆ་ཤོད་བཞིན་པའི་སྐབས་དེ་ག་རང་དུ་སྒྲ་སྐད་རྣམས་དུས་ཐོག་ཏུ་ཡིག་འབེབས་བྱེད་ཐུབ།

འདིས་སྤྱོད་མཁན་ཚོས་བོད་སྐད་ཤོད་བཞིན་པའི་སྐབས་དེར། མིག་མཐོང་ལག་ཟིན་དུ་ངག་ཐོག་གི་སྐད་ཆ་རྣམས་འཕྲལ་དུ་ཡི་གེའི་རྣམ་པར་འཆར་དུ་འཇུག་ཐུབ།

སྒྲ་སྐད་ངོས་འཛིན་བྱེད་པ་ནི་ཐོག་མའི་འཇུག་སྒོ་ཙམ་ཡིན།

སྨོན་ལམ་རིག་ནུས་ཚན་པས་བོད་སྐད་ཀྱི་ཆེད་དུ་དུས་ཐོག་སྐད་སྒྱུར་གྱི་ལག་ཆ་གསར་སྐྲུན་བྱེད་པར་ཡང་རོགས་འདེགས་བྱེད་བཞིན་ཡོད།

སྒྲ་སྐད་ངོས་འཛིན་དང་། འཕྲུལ་ཆས་ལོ་ཙཱ་(Machine Translation) གཉིས་ཟུང་འབྲེལ་གྱིས་ཁ་བརྡ་གླེང་མོལ་བྱེད་བཞིན་པའི་སྐབས་དེ་ག་རང་དུ་བོད་ཀྱི་སྒྲ་སྐད་རྣམས་ཡིག་འབེབས་བྱེད་ཐུབ་པར་མ་ཟད། སྐད་རིགས་གཞན་དུའང་ཐད་ཀར་སྒྱུར་ཐུབ།

ང་ཚོའི་དམིགས་ཡུལ་ནི། བོད་སྐད་སྨྲ་མཁན་ཚོ་དང་འཛམ་གླིང་ཡོངས་ཀྱི་བར་ཕན་ཚུན་འབྲེལ་ལམ་བྱ་རྒྱུ་དེ་སྔར་ལས་སྟབས་བདེ་ཞིང་། ཐུན་མོང་གིས་སྤྱོད་སླ་བ་ཞིག་ཏུ་གཏོང་རྒྱུ་དེ་ཡིན།

ལས་གཞིའི་གོམ་སྟབས་ཀྱི་ཚད་གཞི་འཇལ་བའི་ཕྱིར་སྨོན་ལམ་རིག་ནུས་ཚན་པས་སྐད་ཆ་ཤོད་མཁན་མི་འདྲ་བ་དང་། ཡུལ་སྐད་མི་གཅིག་པ། སྒྲ་འཇུག་གི་ཁོར་ཡུག་འདྲ་མིན་བཅས་འདུས་པའི་ “བོད་ཀྱི་སྒྲ་སྐད་བརྟག་ཞིབ་ཚན་པ་” ཞིག་བཀོལ་ནས་རིག་ནུས་དཔེ་གཞི་འདིར་བསྐྱར་ཞིབ་དང་ཚོད་ལྟ་བྱས་པ་ཡིན།

ཚོད་ལྟའི་གྲུབ་འབྲས་ལས་སྔོན་གྱི་ཐོན་རིམ་ཁག་ལས་མངོན་གསལ་གྱིས་ཡར་རྒྱས་ཕྱིན་ཡོད་པ་གསལ་པོར་མངོན།

གྲངས་འཛིན་གྱི་རྒྱུ་ཆ་ཧ་ཅང་ཉུང་བའི་སྐད་ཡིག་ཅིག་ལ་མཚོན་ན། འདི་ནི་ལོ་རྒྱུས་རང་བཞིན་གྱི་ལམ་ཚད་རྡོ་རིང་ལྟ་བུའི་གྲུབ་འབྲས་ཤིག་རེད།

ཡིག་སྒྲོས་དག་གཙང་གི་ཚད་གཞི་མཐོ་རུ་ཕྱིན་པ་འདི་ནི་ལག་རྩལ་གྱི་གྲུབ་འབྲས་ཙམ་ཞིག་མ་ཡིན་པར། དེས་དངོས་ཡོད་འཚོ་བའི་ཁྲོད་ཁ་ཡོད་ལག་ཡོད་ཀྱིས་ཕན་ཐོགས་ཆེན་པོ་བྱེད་ཐུབ།

སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠ ནི་ང་ཚོའི་མདུན་སྐྱོད་ཀྱི་གོམ་སྟབས་གལ་ཆེན་ཞིག་ཡིན་མོད། འོན་ཀྱང་ད་དུང་ཡང་མུ་མཐུད་ནས་བསྒྲུབ་དགོས་པའི་ལས་ཀ་མང་པོ་ལྷག་ཡོད།

ང་ཚོའི་ཕུགས་རྒྱང་རིང་བའི་དམིགས་ཡུལ་ནི། སྒྲ་སྐད་ངོས་འཛིན་གྱི་མ་ལག་ཅིག་བཟོ་རྒྱུ་ཙམ་མ་ཡིན་པར། བོད་ཀྱི་སྒྲ་སྐད་ལག་རྩལ་གྱི་མ་ལག་ཆ་ཚང་ཞིག་གསར་སྐྲུན་བྱ་རྒྱུ་དེ་ཡིན།

དུས་རབས་མང་པོའི་རིང་ལ། བོད་ཀྱི་ཤེས་རིག་གི་ཉིང་བཅུད་རྣམས་ངག་ཐོག་ནས་གཅིག་གཅིག་ལ་ཕན་ཚུན་བརྒྱུད་སྤྲོད་བྱས་ཏེ་བྱུང་བ་ཡིན།

སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠ ཡིས་ངག་ཐོག་གི་ཤེས་རིག་དེ་དག་གྲངས་འཛིན་གྱི་འཇིག་རྟེན་དུ་དྲངས་ཏེ། བོད་ཀྱི་སྒྲ་སྐད་རྣམས་ཉར་ཚགས་བྱེད་པ་དང་། འཚོལ་བཤེར་བྱེད་པ། གཞན་ལ་བརྒྱུད་སྤེལ་བྱེད་པ། དེ་དག་ལ་ཚུལ་བཞིན་གོ་བ་ལེན་ཐབས་བཅས་ཀྱི་ཐད་ལ་སྔར་ལས་ལྷག་པའི་སྟབས་བདེ་བཟོ་བཞིན་ཡོད།

བོད་ཀྱི་སྐད་ཡིག་འདི་ཉིད་མིས་བཟོས་རིག་ནུས་ཀྱི་དུས་རབས་སུ་གོམ་པ་སྤོ་བཞིན་པའི་སྐབས་འདིར། སྒྲ་སྐད་འཕྲུལ་རིག་ལག་རྩལ་ནི་བོད་ཀྱི་ཤེས་རིག་དང་། ཁྱད་ནོར་རིག་གཞུང་། གོམས་སྲོལ་བཅས་མ་འོངས་པའི་མི་རབས་གསར་པ་ཚོའི་ཁྲོད་དུ་མུ་མཐུད་ནས་དར་ཞིང་རྒྱས་པར་བྱེད་པའི་ལྡེ་མིག་ལྟ་བུ་ཞིག་ཏུ་འགྱུར་ངེས་ཡིན།

ད་ལྟའི་ཆར་སྨོན་ལམ་སྒྲ་འཛིན་རིག་ནུས་ཐོན་རིམ་ ༤.༠ འདི་ཉིད། སྨོན་ལམ་རིག་ནུས་(Monlam AI) དྲ་ཐོག་ནས་དངོས་སུ་བེད་སྤྱོད་བྱེད་ཐུབ་བོ།།